MUJH MAIN JU SHAKS REHTA HAI......(Navii Qist)

Sambhal tu insan jata hi hai, per is sambhalnay main khasa waqt nikal jata hai. Meri talash nay mujhey aik baar phir usi maur per la khara kiya tha jahan main kuch saal pehlay tha. Ye pal bhi guzar jaingay, poora bharosa tha mujhey apna rab per. Wu nawazta hai bin mangay mujhey achi tarhan ye ehsas tha. Younhi din jatay rahay, aur pata hi na chala kay kab teen maah guzar gaye. Ab tu mainey umeed karna bhi chor hi di thi kay sahyed kahin say koi bulawa yan jawab aajata. Ramzan ka babarkat maheena bhi ab janay ko tha. Mujhey aaj bhi wu din yad hai, wu aakhri roza tha, aglay roz eid thi, pooray ghar main eid ki tayariyan zor-o-shor per thi. Ghar main khushiyon ka samaa tha, sab rozaydaar safaiyon main masruuf they, mainey bhi apni almari khol rakhi thi aur barson ka kachra nikal raha tha. Abhi ye kaam chal hi raha tha kay mairay samnay table per paray phone ka vibration mode on huwa tu maloom huwa kay shayed call arahi hai. Mainey lapak kar phone uthaya, ye call Lahore say thi. Pal bhar ko is soch nay janam liya kay Khudaya khair, ye Lahore main mera kaunsa dost yan koi jannay wala nikal aya hai. Mainey isi soch say bahir aatay huwe phone utha hi liya. Ye call Lahore say thi aur koi Rahma naami sahiba thi, phone uthatay hi salaam dua kay baad unhon nay mujhey kaha kay wu Pakistan kay aik buhut baray TV network say bol rahi hain. Main isay yahin rokta hun. Aiye yahan say main apko un logon say milwata hun ju meri zindagi main baray azeez rahay. Ali bhai jinka zikr main pehlay bhi kar chukka hun, mairay bhai jaisay dost. Jibran Changi wu shaks ju mairay school kay zamanay ka dost hai, jiskay mujh per buhut say ehsaanat hain, yan wu uski muhabbat thi jisnay mujhey buhut kuch diya. Mera sath un dinno main diya jab mujhey aik aisay dost ki zarurat thi jisay main apna sab kuch bata dun, apni zindagi ki kataab khol kay uskay samnay rakh dali mainey, aur wu usay parhta raha, aur phir mujhey samjh kar usnay meri zindagi main hamesha mera sath aik muskurahat say deta raha. Usay marun yan naraz hu jaon, per wu tha kay hamesha meray sath youn raha jaisay saya hu apka. Phir usay apni parhayee kay liye Scotland jana para aur aaj bhi wu wahin hai. Jab jab us say baat huti hai dil phir say khil uthta hai. Main aaj jab bhi ye sochta hun tu uskay lliye dil say ju duain nikalti hain wu bayaan nahin kar sakta main. Phir youn huwa kay aik dost kay zareyay mairi aik aur dost bani, sana mohsin. Hamari dosti buhut aam si thi, kabhi kabhi baat yan mulakaat hu jaya karni. Per jaisay jaisay waqt guzarta raha humari dosti ka rang aur pakka huta gaya. Mujhey hamesha aik cheez ki talash rahi, aur wu thi kay koi tu huta ju mera khayal rakhta. Koi tu aisa huta kay ju yahan huta jis say main apnay dil ki har baat kehta. Mujhey aisa aik dost Sana nay apni surat main diya. Mairi har cheez ka khayal rakhna uski aadat hai. Zindagi kay har maur per meri madad karna, sehat ka khayal rakhna, meri choti choti si khushiyan ikatha karna, main pareshan hu jaun tu meri pareshaniyon ko kam karna, bechainiyon ko karar dena. Mujhey jab bhi kabhi dost ki zarurat parti wu hamesha hazir rahi. Waqt ki parwah kiye baghair mera sath diya aur aik achay dost ki haisiyat say khoob kirdar nibhaya. Ye sab karz main kaisay utaronga, main hamesha yehi sochnay lagta hun tu dil-odimagh, dono chup say hu jatay hain, koi jawab nahin mil pata mujhey. Meri jadojuhad main mujhey har pal ye ehsas dilana kay main kar sakta hun, ye kaam is shaks nay hamesha bakhubi kiya.

Meri nazm “Barish sab kuch dho dalti hai” say aik shair, “Meri zindagi kay veeran aangan main kuch log aye aur phir youn gaye, kay naqsh-e-paa na milay tu ye jana gaye, kay barish sab kuch dho dalti hai”, per aaj wu insan ju mairay sukun ka baais hai, meray sath hai aik achay dost ki tarhan.

MUJH MAIN JU SHAKS REHTA HAI......(Aathvi Qist)

Dost hi they ju mairi zindagi main rang bhartay rahay, warna tu ye wu sehra tha jahan barish ki aik boond ko tarsti hai matti. Is baar jab main likhnay baitha hun tu mairi himmat aur haunslay kuch buland nahin hain. Youn mehsus huta hai jaisay dil ko ksi nay salkhon main kaid kar rakha hu. Sanson ki rawani main bhi jaisay ab khalal parh raha hu. Meri sochon per bus aik hi soch hawai hai, kay aakhir kitni baar gir kay uthaunga apnay aap ko. Mujhey talash kiski hai, meri manzil aakhir door kyun hai itni, aakhir ye kaisa imtehaan hai kay jiska nateeja nahin janta main, aakhir ye kaisi justaju hai, main jitna bhagta hun ye utni door kyun chali jaati hai manzil meri. Kaamptay haath, udas lehjay, bheegi bheegi si sochain aur ye pareshaniyan ab kyun hain aakhir. Jawab tu mairay paas kabhi bhi na huwa in sab baton ka, per sochain har pal sath sath rahin. Aik din youn huwa kay mujhey apni naukri chor dena pari. Halaat kuch aisay they kay jin ki bina per mujhey aik saal baad wahan say rukhsat lena hi pari. Ab phir say youn mehsus huta tha jaisa wohi zindagi nay aik baar phir say mazaq kiya hai mairay sath, meri himmat maira haunsla toot sa gaya tha. Us din tu abba nay bhi aakay kandhay per haath rakh kar kaha, beta pareshan mat huna, youn tu hu hi jata hai, Khuda ki zaat bari raheem-o-kareem hai, aik dar band tu so khul jatay hain. Bazaahir tu wu buhut hi mazbut dikhayee detey they, per main ye achi tarhan janta tha kay unko bhi dukh tha, kamzur hu chukay they wu andar say. Wu raat buhut bhaari thi, mujhey aisa lag raha tha kay jaisay zindagi aik baar phir usi maur per aakay ruk gaye jahan say aik saal pehlay ye safar shuru kiya tha. Raat bhar buhut roya, aankhain thi kay thakti nahin thi, aur aansu they kay ruktay nahin they, aik ye aansu hi tu they kay jinhun nay hamesha mujh say aur meri aankhun say wafa ki, sath khuub nibhaya, aksar chalay aatay ye maira haal puchnay, shayed mujhey tanha nahin dekh patay they. Sukun ki talaash main nakaami huwee tu Khuda kay huzur sajdarez huwa, tu apna aap buhut chota mehsus huwa, zar-o-kataar aankhain ronay lagi, jism laraznay aur kaamnay laga. Mujhey zarurat thi aaj shayed kisi aisay maujzay ki, jiskay hunay say meri kaifiyat badal jaati, sukun mil jata, meri sochon ko karar aajata. Is zindagi ki daur main khoya insane kabhi kabar itna majbur hu jata hai kay usay apna aap buhut chota lagta hai. Khuda ki zaat jab apnay banday ko apni shafqat aur muhabbat ki lapait main le leti hai tu youn lagta hai jaisay har dard har zakhm bhar gaya hun, har pareshani hal hug aye hu. Isi sukun ki talash main tha us raat main, sujuud aur ibaadat nay ab kuch kuch halka kar dala tha wajud ko mairay. Wu kitna beniyaaz hai, kitna raheem-o-kareem hai, wu zaat kitni azeeem hai. Us raat sab karnay kay baad aankh lag hi gaye. Naye suraj kay sath utha tu man ko buhut halka paya, aik naye umeed liye nikal para. Ali bhai ki taraf gaya tu wu muskura kar dekhnay lagay mujhey, aur kehnay lagay kyun pareshan hutay hu, ye naukriyan tu aani jaani cheez hain, ye na sahi tu koi aur sahi. Din guzartay rahay, main CV banks bharta raha buhut si multi-nationals kay. TV channels say ley kar aik call centre tak sab jagah bhej dali CV apni. Aik nayee talaash kay liye nikal tu para tha per ye bhi janta tha kay is juey main haar yan jeet ka kuch pata nahin.

Gir kay sambhalna aur sambhal kar phir say gir jana, buhut takleef deta hai.

MUJH MAIN JU SHAKS REHTA HAI......(Saatvi Qist)

Udasiyan tu zindagi ka hissa hain, zinda rehna hai tu pareshaniyon aur udasiyon say larna parta hai. Phir youn huwa kay wu din bhi agaya jab mujhey daftar jana shuru karna tha. Raat ko hi sab tayari mukamal kar kay main apnay bister per ja leta. Zehen na janay kya kya soch raha tha. Khair in sab tensions aur pareshaniyon kay bawajud, dil main aik ajeeb si khushi ka samaa tha. Suraj aaj phir apni aab-o-taab say chamak raha tha. Garmi ki shidat apnay urooj per thi. Tayyar huwa tu abba ji nay parh kay dam kar diya, aur maa ki duain liye nikal para main. Bus stop per gaya tu aaj bus bhi jaldi hi mil gaye, aur main youn jald hi apni manzil-e-maqsood tak pohonch gaya. Wu mera pehla din tha, upper gaya tu reba say salam dua kay baad, mujhey mera computer aur desk dikha diya gaya. Mujhey ju desk diya gaya wahan pehlay say dher saray kaaghaz aur dusray istimaal ki cheezain bikhri pari thi. Mera kaam yahin say shuru huta tha. Main utha aur dheray dheray us desk ki safayee shuru ki. Hum teen logon ka aik hi post kay liye chunao huwa tha, aur wu tha editorial assistant ki post. Main safayee kar kay abhi baitha hi tha kay meri nazar samnay paray kuch international magazines per pari. Mainey un main say do PC magazines uthaye aur parhta raha. Phir reba nay mujhey bulaya aur kuch rules aur regulations samjhnay lagi. Mujhey do kaghaz diye gaye jin per editing kay rules likhay huwe they, aur mujhey ye taakeed ki gaye kay ye mujhey rat lenay hain. Mujhey ye bhi batay gay a kay in kay baghair main kuch nahin kar paunga. Main wu kaghaz liye apnay desk per agaya aur aathwi jammat kay bachay ki tarhan usay yaad karnay ki bajaye, samjhna shuru kiya. Mujhey kuch hi waqt laga aur youn mairay ghar janay ka waqt huwa. Daftar main pehla din guzar kar kaafi khushi huwe, ye meri peshwarana zindagi ka pehla din tha. Phir youn huwa kay din maheenun main badaltay rahay. Kaam main maharat tu aik maheenay baad hi hug aye thi. Yahan mairay buhut say achay dost bhi banay, jin main Khayam, Junaid, verdah saray fehrist hain. Humain ab wahan kaam kartay kartay aik saal hunay ko tha. Aik baat tu main batana hi bhul gaya, wu ye kay, kaam kay sath sath mainey apnay bachelor main admission bhi ley rakha tha. Ye bachelor main Pakistan ki aik online university say kar raha tha, jahan mujhey ye faida mil jata tha kay main apni naukri kar sakta tha aur jab imtihaanon ka waqt aata tu main editor say chutti lay kar imtehaan dey aata. Youn raat bhar parhna aur subha kaam per chalay jana. Din kattay rahay, aur pata hi na chala kay kab is masroofiyat main aik saal beet gaya. Main aksar ye sochta kay kya zindagi isi kaam kay liye dig aye thi, kay yahan aao, majburion aur pareshanion say mukabla karo, jis main har hugi ya jeet hugi, ye janay baghair is maidan-e-jang main utar jao, aur umr bhar aik justaju main guzar do, yan phir iskay aur bhi maqaasid they, per soch aakhir kahan tak sath deti. Ab youn lagnay laga tha kay jaisay main aik taweel arsay say safar main hun, aur buhut chalnay kay baahis aeriyon main ab dard huna shuru hu chukka tha jaisa, taangon main dam khatam huta mehsus hunay laga tha, bus aik hi soch puray wajud per hawi thi, kay ye jis manzil ki janaib rawan dawan hun, kya usay dekhna naseeb huga bhi kay nahin. Is justaju nay itna masroof kar dala kay waqt kay guzarnay ka andaaza hi na huwa. Na kisi dost say baat hu paati na mulakat. Wu yehi justaju thi jis nay mujhey is duniya say kaat rakha tha. Mairi zindagi main kaafi shaks mairay kareeb rahay, yahan tak kay safar main kaafi chehray achay lagay, kaafi chehron kay peechay chupay dushmani kay aasaar bhi dikhayee diye. Maira halka-e-yaran buhut hi chota raha hai hamesha, kuch achay dost mujhey khonay ka dukh aaj bhi hai, per shayed pashtawa nahin. Waqt aur halaat ka yehi takaza tha aur humain alag huna hi tha. Shayed meri isi justaju kay baais main unhain kho baitha tha, yan wu dost tu buhut achay they, be-inteha chahnay walay, per shayed wu mujhey kabhi samjh hi na paye, aur shayed meri is jado-johad main rukawat bantay rahay. Unki kami tu aaj buhut mehsus huti hai per unhain ley kar main udas nahin huta. Meri justaju ju hai kuch kar dikhanay ki wu rawan hai waqt kay sath sath.

Dosti bhi kya cheez hai, na hu tu wajud adhura, aur hu tu zaat mukamal.

MUJH MAIN JU SHAKS REHTA HAI......(Chati Qist)

Khushi tu aati hai kuch pal kay liye, aur insaan ko maloom hi nahin parta kay beshumaar dukhun main kahin koi aisay pal kab aye aur kab chalay gaye. Chehray par aik muskurahat liye bhagtay bhagtay Shaheen Complex tak pohoncha aur bus main sawar huwa. Bus main hamesha ki tarhan rush tu buhut tha per seat mil hi gaye kisi na kisi tarhan. Mairi khushi ki inteha na thi, dil ki dharkanon ko jaisay kisi nay itna barha dala hu kay sansain bhi ataknay lagi. Mairi muskurahat dekh kar sath baithay bhai sahab ko taajub hunay laga, wo bhi sochtay hungay kaisa insane hai, apni dhun main mast muskuraye ja raha hai, no koi wajah na koi samaa. Kartay kartay maira utarna ka waqt aur jagah aahi gaye, main bus say utra aur ghar ki janib rawan hu gaya. Dil thamay, khushi dabaye main ghar kay darwazay per pohonch kar bell per hath rakh kar bhool hi gaya kay hath uthana bhi huta hai. Chotay bhai nay darwaza kholtay hi sawaal kia, kay kya huwa bhaiya? Mainey muskura kar kaha hu gaya, andar aya tu sab ko kay chehray is khushkhabri say youn khil utthay kay jaisay sehra main kaain barson baad sawan ki rut chali hu. Ye khushi kay pal ju meri zindagi main aye they, youn mehsus huta tha kay jaisay ab waqt agaya tha kay taqdeer nay kuch karwat badal dali thi. Khuda kay huzur sajda rez huwa tu aankhain na reh saki, zar-o-kataar aansuon nay bhi khuda kay huzur shukr ada kia. Wu suna tu tha hi kay khuda kay haan dair hai andher nahin, ye aik line aaj mujhey baar baar yad arahi thi. Kitni beshumaar naimaton say nawaz rakha hai maula nay, aur nawazta chala jata hai, belaus pyar hai us khuda ka apnay banday say, na amaal dekhta hai na buraiyan, bus nawazta hai apnay banday ko unghinat naimaton say, per banda hai kay hamesha hi nashukri kartay kartay zindagi guzar deta hai, us khaaliq-e-qainaat say gilay shikway kartay guzar deta hai. Insan bhi bara hi ajeeb hai, mushkil ki ghari aur pareshaniyon main khuda ko har pal har waqt yad karta rehta hai, aur jab khushiyan uski zindagi main aati hain tu wu bajaye iskay kay apnay usi Rabbul Izzat kay huzur jhuk kar, sajda rez hu kar shukr ada karay, un khushiyon main kho jata hai. Kya faida aisi khushiyon ka kay jin main kho kar apna Rab yad na rahay. Mujhey hamesha younhi lagta tha kay jaisay meri dhukon bhari zndagi main kabhi bhahar nahin ayegi, per jab wu aye tu aisay aaye kay mairay wehem-ogumaan main bhi na tha.

Udasiyan bhi kya ajeeb cheez hain, na hu tu khushi, aur hu tu mayoosi hi mayoosi.

AE NEEND AB TUN AAHI JA.......

ae neend ab tun aahi ja

kitnay baras beet gaye,

kitnay mausam badal gaye,

kaisay rahun ab terey bin,

ae neend ab tun aahi ja,

taras gaya rut sawan ki,

pheekay din hain bin barish kay,

kaisay rahun ab terey bin,

ae neend ab tun aahi ja,

kaisay kahun wu saari batain,

tooti umeedain ujri raatain,

kaisay rahun ab terey bin,

ae neend ab tun aahi ja

tanha tanha kat'ti shamain,

rahi adhori sari kitabain,

kaisay rahun ab terey bin,

ae neend ab tun aahi ja,

ujar gaye wu pattay saray,

jis chaun talay wu pal guzaray,

kaisay rahun ab terey bin,

ae neend ab tun aahi ja

MUJH MAIN JU SHAKS REHTA HAI......(Paanchvi Qist)

Ghurbat tu aik azaab thehri. Is zamanay kay naseheb-o-faraz nay insaan ko kisi kaam ka nahin chora. Halaat ko agar dekhain tu har taraf hirs-o-hawas kay badal chaye dikhayee daingay. Khoon kay pyasay ye apnay logon nay apni hi is jannat ko ujaar diya. Isi dehshatgardi aur loot maar nay mulk ko aaj tak taraqqi say rokay rakha hai, ye wu sarzameen hai jahan qudrat kay baawan phal, chaar mausam, aur beshumaar un-ghinat aisi naimatain hain kay jinko ginnay baith gaya tu shayed khasa waqt beet jaye. Sawal tu bus ye hai kay itna sab kuch hunay kay ba-wajud yahan ghurbat aur mayusi kyun hai. Kyun itney naujawan ju abhi jawani main kadam rakhtay hi hain tu khudkushi jaisi lanat ko apna letay hain aur hamesha kay liye anmol zindagi ko apnay hi hathon khatm kar detay hain. Haan ye mulk buhut hi khubsurat hai per afasos is mulk kay naujawanon nay hamesha apni panah-gaah dosrey mulkon ko banaya, aur iski traqqi ki taraf kabhi dehan na diya. Mainey is muashray aur iskay nizaam say jahan kisi baat kay hunay ka koi imkaan nahin tha, buhut si umeedain laga rakhi thi. Phir youn huwa kay aik din aik call mairey cell per aaye, uthanay per pata chala kay wuhi IT magazine ki editor Reba Shahid ka phone tha. Mujhey aglay hi roz interview kay liye bula liya gaya tha. Us raat neend nay khair-baad keh diya aur chor kar kahin aur kisi ki ankhon ka hissa ban gaye. Main raat bhar jagta raha, tarhan tarhan kay khayalat zehen main aatay rahay. Mairi zindagi ka pehla pehla interview tha jisay mainey har haal main pass karma tha, aur ye naukri ka sunehri mauqa zayaa hunay say rokna tha. Main uth khara huwa, 2 ghantay laga kar jootay polish kar kay aik konay main rakh diye, ab baari thi kapray istaree karnay ki, mainey apni sab say achi shirt aur pant nikal li aur istaree karnay laga, dil main aik ajeeb si ghabrahat thi, dharkanain jaisay sawaal kar rahi hun. Aakhir ye waqai hu raha hai yan ye koi khuwaab ha, aisi sochon nay saans lena dushwaar kar rakha tha. Mujhey tu ye bhi nahin maloom tha aglay roz kya hunay wala tha. Suraj ki kirnain khirki say hutey huwe kamray jab girnain lagi aur ghantay minton ki rafter say guzarnay lagay tu mainey tayyari karma shuru ki. Naha dho kar tayyar hunay kay baad, abba aur amma ji ki duain liye main ghar say nikal para. Kadam jaisay jam say gaye hun, chalna dushwaar, chaltay chaltay bus stop tak pohonch tu bus ka intezar karnay laga. Aisi halat pehlay tu kabhi na huwe thi jaisay us roz bus stop per kharay kharay huwee. Aakhir bus aahi gaye aur main sawar hu gaya, bas parh chahrnay kay baad ye mehsus huwa kay jaisay pura shehar INTERVIEW hi dainay jar aha hu, janwaron ki tarhan ghussay huwe un logon main say aik nay apna paaun mairay paun per rakh diya, yani saari raat ki ju mehnat thi jootay polish karnay ki wu raaigaan gayee. Ghussay nay apni lapait main ley liya mujhey, aur mairay sir ko ghumnay main zayada waqt na laga, baharhaal apnay ghussay per kaaboo patay huwe main aik seat ju khali hu chuki thi, per baith gaya aur stop aanay tak chup chaap aankhain band kiye durood-sharif ka wird karta raha. Chaheen Complex ki aawaaz lagi tu main chonk kar khara huwa aur utar gaya. Puch puch kar aakhir main us building tak pohonch hi gaya ju mairi manzil thi. Andar daakhil hunay hi laga kay secutiry guards nay rok liya, shanakht kay baad mujhey VISTORS’ CARD dey diya gaya aur ye bhi bata diya gaya kay upper doosri manzil per sab say aakhri karma huga. Main dabay paaon, atakti saanson say seerhiyan charhta raha aur us kamray tak pohonch gaya. Ye aik kaali dewaron wala karma tha jiskay darwazay per aik buhut bari marki bani huweee thi. Andar ja kay baitha tu us magazine ki editor Reba nay mujh say puchna shuru kiya. Main ab thora sa behtar mehsus karnay laga tha. Reba kay sawalon kay jawab deta raha, aur aakhir aik sawal ju mujh say pucha gaya wu computer languages kay baray main tha, jiskay jawab main mainey keh diya kay main ismain buhut bura raha hun hamesha aur fail bhi. Reba ye bat sun kar hasnay lagi au rkehnay lagi, wah bhai tum tu sachay aadmi niklay, zara bhi na socha tum nay kay ye aik interview hai aur jis magazine kay liye tum kaam karnay aye hu wu aik IT magazine hai. Main muskura dia, jiskay baad mujhey reba sahiba nay ye keh kar janay ko kaha kay main jald say jald kab shuru kar sakta hun. Mairi khushi ki inteha na thi. Rabbul Izzat ka jitna shukr ada karta kam tha.

Khushi bhi ajeeb cheez hai, na hu tu andhera aur gar hu tu ujala hi ujala.

AIK SHAIR......

Main hun tu ik saraab per roshni say darta hun
Ju waja hai mairay wajud ki us waja say darta hun

MUJH MAIN JU SHAKS REHTA HAI......(Chothi Qist)

Majburiyon ka kya hai, ye tu insaan kay sath sath har waqt kayam kiye rehti hain. Bebasi aur laachari do aisee cheezain hain yan do aisay naag ju insane ko dastay rehtay hain. Hamesha say aik achi zindagi ki justaju liye mainey apnay wajud main aik nayee dunia kayam kar rakhi thi. Mujhey is soch nay kaafi honsla diya kay mujhey kuch kar dikhana hai.. Mainey achay numberon say apnay school ko khatam kiya aur A levels kar liya kisi tarhan. Yahan tak ka safar bara hi dushwaar raha. Maan baap nay buhut saath diya har maur per. Insan kitna kuch karta hai pait kay liye, parhta hai, naukriyan talash karta hai aur jab mil jaati hai tu bus usi ka hu kar reh jata hai. Mujhey ab aik aur imtehaan say guzarna tha. Ye waqt ab tha apni zimaidaariyon ko samjhnay ka. Walid sahib nay jitna kar diya tha hum sab kay liye wu shayed buhut hi zayada tha, ab waqt tha apni soch mustahkam karnay ka aur faisla karnay ka kay aakhir ab karna kya huga aur kaisay? Tang dasti kay baahis main aik online university main admission ley kar baith gaya, aur sath hi sath bachon ko tution parhata raha, ye tution parhatay huwe tu ab aik zamana guzar chukka tha, youn lagta tha jaisay zindagi main aur koi kaam kia hi na hu. Naukri ki talash nay buhut sataya. Ye bara azeem mulk hai per yahan mushkilaat behisaab hain. Kharchajaat barhay tu naukri ki talaash main nikal paray, aakhir kab tak borhay aur ghareeb baap kay kandhon per sawari kartay. Phir ju azm liya tha aur thaan rakhi thi kay ab karna huga kuch na kuch, is azm ko liye nikalna hi para, sarkon ki khaak chantey huwe, daftron kay chakar lagata raha. Kaain din kaain raatain isi jutaju main beet gayee per kahin say koi jawab na aya. Mairay sab say kareebi bhaiyon jaisay dost Ali Bhai hain. Ju mairay paros main rehtay hain. Aain kuch inkay baray main bhi kehta chalun. Aankh khuli tu inko paya. Hamri dosti ko main salon main kaisay tarashon. Ye tu jab say main hu tab say hai. Mujh say umr main baray is dost nay hamesha sath diya mairay, achay buray waqt hum logon nay sath guzaray. Zindagi ki kaafi baatain, dukh gham ki ghariyan sath bitaain. Wu kehtay hain kay aik acha dost mil jaye tu insaan ki adhi mushkilaat main kami hu jati hai. Khuda ki beshmaar naimaton main say aik naimat acha dost bhi hai. Ik din youn huwa kay apna dukhra unhain sunatay sunatay unki nazar akhbaar main aik ishtihaar per pari, ye ishtihaar Pakistan kay aik maaroof IT magazine ka tha. Ye akhbar ki duniya main Pakistan ka sab say purana aur bara naam tha. Iskay sath sath beshumaar aur idaaron main bhi darkhuwastain bheldali mainey. Ab bus taweel intezar tha kay kahan say bulawaya kab aata hai. Intezar ki is taweel musafat nay mujhey kaafi baatain kehnay aur sochnay per majboor kar dia, aakhir ye kaisa nizaam hain, yahan kyun ghareeb ghareebtar aur ameer ameer-tar huwa jata hai, yahan inti behisi kyun hai aakhir. Pal ghanton main aur ghantay dinno main badaltay rahay per kahin say bulaway na aya, haan agar kuch aya tu wu thi bebasi. Bebasi bhi insaan ko kamzor bana deti hai, magar isko ley kar insaan baghair preshan huwe uth khara hu tu yehi insaan ki himmat ka sabab ban jati hai.

Ghurbat bhi ajeeb cheez hai, na hu tu khushhaali aur hu tu ghussa, laraye aur bebasi.