MERAY HATHON KI LAKEERAIN....

Wu bari dair tak mera hath thaamay meray hathon ki lakeeron ko parhnay ki koshish karta raha, usay ye lagta tha kay wu meray naseeb main nahin. Mujhey per us say thi muhabbat be-inteha.

Uski heraan aankhain kuch kehna chahti thi, lekin alfaaz shayed saath nahin day rahay thay uska. Usay ye khauf bhi tha kay agar wesa huwa kay jesa lakeeron main likha ja chuka hai tu wu kesay rahayga meray sath umr bhar, usay mujh say muhabbat ju na thi.

Aur ye itmenaan bhi kay lakeerain kaunsa sach kehti hain, Mustakbil ka haal tu khuda ki zaat kay ilawa koi bhi nahin jaanta. Uskay chehray kay badaltay huwe rang kaafi numaya thay. Mujhey dilasay tu deta raha din bhar aur shaam huwee tu ye keh kar chal diya, khuda tumharay naseeb achay karay.

Uski is berukhi aur sard lehjay nay meri saari umeedain maar daali thi. Main janta tha kay wu meray naseeb main nahin phir bhi uski khushi ki khaatir mainey apnay haath hi jalaa daalay....

Aur wu shaks meray haathon ki lakeeron main hi kahin kho gaya.

TUM NAHIN TU KYA HUWA....

Baraa baras ka taweel arsa guzar chuka hai hamaray beech, aaj barson baad hum milay, aaj bhi milay tu fakat tumhari hi baat huwe.

Dost - Khuda Ta'ala nay aik ajeeb hi rishta bana dala hai, insaan inkay bina pura hu kar bhi adhura hi rehta hai shayed.

Maazi ki buhut si baatain jinahin insaan kabhi faramosh nahin kar sakta, per chahtay huwe bhi yaad ka wu hissa umr aur wakt kay sath sath dhundlaa jaata hai,

Meray sath bhi kuch aesa hi huwa, halaat aur zimedaariyon nay aesa ghera kay maazi aur bachpan kay un khoobsurat lamhaat ki yaadain dhundlaa si gayee, jinahin main kabhi bhulana nahin chahta tha,

Aaj jab hum milay, tu kuch mujhey yaad tha kuch unhain, meray baar baar israar per wu kissay aur baatain chal nikli jinhain main kisi tarhan shayed bhool chuka tha,

Suno, unhain ye lagta hai main sirf tumhari baatain karnay aur jan'nay kay liye shayed unsay milta hun, lekin wu mazaq kartay hain, hastey hain, mujhey tang kartay hain, tu buhut acha mehsus huta hai, kay meray aas paas hasnay walay chehray aaj bhi maujood hain

Tumharay baad bhi dekho meray sath hain meray log ju tum say nisbat rakhtay hain, tumhain kya lagta hai, main sab bhool chuka hun, mujhey yaad hai shayed kuch kuch ya phir buhut kuch,

tum nahin tu kya huwa, meray sath hain meray kuch anmol dost

YAAD-E-MAAZI...

Aaj mudaton baad aik aesi hasti say milnay ka sharf haasil huwa, aik aesi shaksiyat ju buhut hi mautbar darjaat rakhti hain, jin say mansoob hain meray maazi ki kuch pur-musarrat yaadain, bachpan ki kuch haseen aur masoom si sharaartain aur unsay juri unki hastay huwe andaaz main wu daant bhi yaadon ka buhut hi khoobsurat hissa hai.

Aaj muddaton baad unhi say suna, 'yaadain maar daalti hain'. Bazaahir sach lagnay wali ye baat na sirf hakeekat per mabni hai balkay buhut say mussanif is baray main buhut kuch tehreer bhi kar chukay hain.

Likhnay walay bhi aksar kamaal kar daaltay hain, ye aik shair ju kuch is tarhan say hai kay, "Yaad-e-maazi azaab hai ya rab, cheen lay mujh say haafiza mera", apnay andar buhut samaye betha hai.

Yaad - ya tu talkh huwa karti hai ya phir be-intehaa haseen. Agar talkh hu tu jab jab wu yaad aati hai tab tab insaan ka pura wajood toot kar bikhar jata hai, per aglay hi lamhay agar socha jaye tu maazi ki koi haseen yaad usay kuch kuch bhulanay main madad zarur karti hai.

Har roz jab parinday apnay gharon ko janay lagtay hain, shaam kay gehray saye tareek say tareek tar hutay jatay hain, suraj apni jagah chor kay kahin kho jata hai, tu phir wuhi koi bhuki bhatki si yaad purani aajati hai, aur mera wajood hazaar tukron main bikhar jata hai.

Har subha jab uth'ta hun tu usi bikhray huwe wajood ko samet'ta hun aur jeenay lagta hun. Zinda rehnay kay liye zaruri hai kay na sirf muskurahaton say rishta banaya jaye balkay khushiyon ki talaash main bhi nikla jaye.

Bas phir har mehroomi ko peechay chor kar nikal jana chahiye, talaash main, aik aesi talaash main jismain fana bhi huna paray tu koi muzaika nahin, per is talaash main kho kar apna aap mil jata hai, aur na bhi milay tu Rab zarur mil jata hai.

Maazi ki mehroomiyon ko bhi ye bata dena chahiye kay mera aaj tum say kayee gunaah haseen hai, ju kal nahin tha aaj wu sab mainey haasil kar liya hai, na bhi kiya hu tab bhi shayed behlaaway buhut sa kaam kar daaltay hain.

Yaad-e-maazi jesi bhi hu, bas agar hum usay apni kamzori bana daalain tu shayed zindagi wahin theher jaye, jeena tu aesay chahiye kay wuhi yaad ju dukh ka baais banay usay apni kamzori ki bajaye taakat bana kar jeena chahiye.

Aasaan huta hai kehna per amal main lana be-inteha mushkil, lekin agar niyat baand li jaye tu aur koshish ki jaye tu sab asaan hu jata hai.

Yaad maar tu zarur daalti hai, lekin phir ye yaad na hu tu hamaray mustakbil aur haal ki bhi shayed koi ehmiyat na rahay, ye yaad hai tu buhut zaalim per zinda rehnay kay liye zaruri bhi tu buhut hai.

AKHIR HU KAHAN TUM....

Tum kahan hu?

Tumharay lehjay main ju mithaas huwa karti thi, us mithaas main chupa, madhosh kar denay wala wu saaz mujhey raat bhar sonay nahin deta,

Tumhari zulfon say jab tez hawa ka jhaukna choo kay mujh tak pohonchta tha, tu fiza mehak si jaati thi, wu khushboo mujhey raat bhar sonay nahin deti,

Tumhara tirjhi nigaahon say dekhna, dekhtay dekhtay muskurana aur chup hu jana, un aankhon ki wu shararat mujhey raat bhar sonay nahin deti,

Tumhara baat baat per jhagarna, aur us larayee larayee main hi achanak maafi maang kar sab bhula dena, wu rawaiy'ya mujhey raat bhar sonay nahin deta,

Tumhara mujh say aik nashit peechay bethna, aur sargoshiyan kartay rehna, un sargoshiyon main chupi masoomiyat mujhey raat bhar sonay nahin deti,

Mujhey yaad hai sab kuch kuch, maazi main guzra wu wakt ju hum nay sath bitaya, un lamhon ki yaad mujhey raat bhar sonay nahin deti

Tum kahan hu? kam say kam meri neendain tu lauta jao, is aziyat main jeena buhut takleef-deh sa lagta hai.

TUM AUR MAIN....

Suno, kabhi us raastay say guzarna hu, tu mera aik kaam kar dena, bas ye ehsaan kar dena, mita dena wu naam hamaray, ju kabhi mainey tumharay behad israar per, tarasha tha aik aik lafz,

Kay shayed aesa karnay say, sookhay huwe un darakhton ko, dobara jaan mil jaye, muhabbat kay piyasay jungle ko, zindagi is baar mil jaye,

Suno tum aesay karna kay, mera hi naam mitana bas, rehnay dena apna naam, kay jab koi puch bethay ga, tu beshak, tum ye keh dena, wu shaks bara hi bewafa nikla,

Mukammal sach tu ye hai kay, tumharay baad zindagi ka, koi maqsad nahin baaki, muhabbat tu hai baaki per,

Na tu baaki na main baaki.

AIK SHAIR....

kahani fakat do lafzon per thi mabni
sunate jisey umr saari guzar gaye

ILTIJAA....

Mujhey koi tu panaah dey day, ye muhabbat ki aandhiyan sab kuch ujaar daingi

IS BAAR JU AAO TU....

is baar ju aao tu yaad se saray adhuray kaam mukam'mal kar dena
meray kuch aakhri sans tumhari qaid main hain unhain azaad kar dena

lauta dena subha kay ujaalon ko unka sukun, chen unki apni roshni
raat kay sanaton ko bhi udaas aankhon ki maanind khamosh kar dena

mita dena wu fursat kay lamhay, wu shajar per tarashay huwe naam
veeran jungle ko bhi dukh bhari kahani apni is baar tum suna dena

likhna kaaghazon kay panon per daastan-e-ishq tafseel say apni
aur kitaabon main paray barson puranay phoolon ko bhi rula dena

dar ju lagay ruswayee say agar, tu be-dharak mera naam ley kar
meri belaus muhabbat ko bewafayee ka unwaan dey kar suna dena

chalo aesa karna, meri aakhri saansain bhi mat lautaana mujhko
unhain meri sachayee ka gawaah samajh kar, dil main hi dafna dena

KAHA THA NA TUM SAY....

Kaha tha na tum say, roshan sawera zarur ayega, mayoosi umeedon ka laibaada orhay najanay kab say dehleez kay paar khari thi, lekin ye bhi buhut khoob huwa kay andheray nay wafa na ki, is baar ju ye andhera ruk jata tu shayed har taraf mayoosiyan aur pareshaaniyan deray daal leti.

Kaha tha na tum say, gham chalay jaingay, in kay theher jaaney ka wakt tu buhut taweel huta hai per aik taweel musaafat aur bardaasht kay baad milnay wali rahat ka bhi tu phir aik alag hi lutf huwa karta hai, per tum thay kay samajhtay hi na thay, zindagi itni haseen bhi hugi kabhi socha bhi na tha tum nay.

Kaha tha na tum say, kay is baar jab bhi muhabbat tumharay aas paas mandlaanay lagay, uski khushbu ko mehsus karnay lago, tu aankhain band kar lena, aur is wajd ki halat main khuda ko yaad kar lena, wu baatain sach huwee tu, muhabbat hu hi jayegi, aur aik baat yaad kar rakhna, muhabbat rooth jaye tu azeeyat kam nahin huti.

Kaha tu buhut kuch tha shayed tum say, lekin ye tu kabhi socha hi na tha, kay itna kuch keh daalnay kay baad alfaazon ka ye zakheera khatam hunay lagayga.

Aur wuhi huwa, ye aakhri chand alfaaaz bachay thay, tu socha is baar kuch apnay liye bhi likh daalon, tumhain samjhatay samjhtay, wu sab kehtay kehtay, meray saray lafz chalaey gaye, aur apnay liye ab meray paas kuch bhi nahin raha

Mujh per itna tu rehem kartey jao, meray hi kuch lafz meri zindagi kay naam kartey jao, warna jeena shayed mahaal hu jaye. Aur wu jatey jatey bas itna keh gaya kay,

kaha tha na tum say!

AIK SOCH...

Tun ju jaan sakta agar haal-e-dil mera, tu khamosh muhabbat ke siva shayed kuch na milta.

ZINDA HUN ABHI....

Maana kay tumhain jaldi hai buhut, per zara thehro, meri zindagi kay din raat, unmain chupay zindagi kay aasaar tu lautaati jao, lauta do wu bachpan kay din, wu muhabbat ju tum say hi kee har pal har soo, wu pal aur un lamhon main chupay jazbaat tu lautaati jao, 

Suno zara theher hi jao kay saans abhi baaki hai

MUKAM'MAL SAWAAL, ADHURAY JAWAAB....

Rishtay nibhatay nibhatay thak gaya tha tab tak main, lekin isi aas main kay meri is mehnat aur justaju say meray saray dost yaar aik jism aik jaan banay rehtay hain, kabhi himmat nahin hari thi. Tab chot kisi ko laga karti thi tu dard koi aur mehsus kiya karta tha, buhut hi nayaab wakt, baray anmol lamhay thay wu. Mainey ye sun tu zarur rakha tha kay wakt aik jesa nahin rehta hai, lekin us din pehli baar is baat ko apnay saamnay sach hutay bhi dekha, sab khatam hutay dekha mainey. Wu saaray log, ju jaan nichaawar kar denay kay dawedaar rahay, choti choti ghalatfehmiyon nay unkay rawaiye hi badal daaalay.

Youn mehsus hunay laga tha kay aik aesay darhkt kay neechay aa khara huwa kay jiska saya tu hai, per us saye ki tapish shayed dhoop say kayee gunaaah zayada thi. Dosti ki bunyaad per banay rishtay kya itnay kachay hutay hain, itnay na-paedaar huwa kartay hain kay choti si ghalat fehmiyaan unhain reza reza kar dalti hain. Sab juda hu rahay thay, mulakaaton main ab taweel waqfay aanay lagay thay, na baat huwa karti thi, aur naa hi koi baaat samaaton say aakar takraati thi. Dheeray dheeray jab ye dhaagay mazeed ulajhnay lagay, tu in main anaa ki aag bharak uthi, aur ye uljhay dhaagay kab jal kar raakh ban gaye, pata hi na chal saka. Aaj aik muddat baad usi jagah, sumandar kinaaray aa khara huwa hun. Buhut saal guzar gaye hain, buhut wakt beet chukka hai, itna kay ab tu wu yaadain wu baatain aur unki soch bhi kuch kuch dhundlaanay lagi hai.

Wesay tu dil main buhut say sawwal janaam letay rehtay hain, per is baaar ju dil ye puch betha hai kay agar nibhaana nahin jaantay they tu phir aadat daali hi kyun thi? wu zara si pareshani per kaanp uthna, zara si takleef baar baar puchna, agar dard hi dena tu phir un gehray zakhmon per marham rakha hi kyun tha?

Bas inhi aur is tarhan kay kayee sawaalon kay jawaab dhundnay aaj buhut barson baad usi jagah phir say aakhara huwa hun, shayed sawaalon aur jawabon ki aarrh main koi bhula bhatka meri tarhan ka puraana yaar hi mil jaye yahan, lekin hum dono hi tanha aur akelay kharay aik doosray ko dekh rahay hain, main aur ye udaas tanha sumandar.

AIK SHAIR....

muhabbat agar sajdon kay ewaz milti
tu sir utha kay jeenay ki fursat na huti

INSAAN....

Insaan - bazaahir aik lafz hai, per isay agar ghaur aur itmenaan say parkha jaye tu buhut si haqeeqaton ka samna karna parta hai, jin main say kuch tu khushi ka baais banti hain, aur kuch be-inteha talkh. Insan ki takhleeq khud aik ajooba rahi hai hamesha say.

Bazaahir dekha jaye tu har insaan koi na koi daaway zarur karta hai, apni hasti main apnay aap ko hi kisi na kisi tarhan munfarid samajhta hai. Lekin haqeeqatann aesa kuch nahin huta. Bazaahir dekho tu aik mazboot shaksiyat, lekin andar say sab dhoka, fareb, jhut aur naa-paidaari.

Insaan hai ju maseeha kay roop main namudaar huta hai, aur phir yehi insaan aik khatarnaak janwar ki maanind bhi dikhaye deta hai. Khuda nay tu isay makhlukaat main afzal tareen bana bheja, lekin iskay amal nay isay kahin ka na chora.

Khuda nay phir isay emaan jesi dolat say bhi nawaza, aur sath hi sath, nafs ko bhi takhleeq kar dala, emaan kay imtehan kay liye. Bas jis shaks nay nafs ko apnay uper haawi na hunay diya aur apnay hi aap main lagi is jang ko jeet liya, wu insaan hamesha kay liye amr huwa.

Bazaahir dikhnay wala aik mazboot insaan, dil main kya kya liye betha huta hai ye yaa tu wu khud janta hai ya Khaaliq-e-Qainaat. Kisi bhi halat main khush na rehnay wali hasti ka naam bhi insaan hi hai.

Zindagi bhar mehnat karta hai, jad-o-johad karta hai, kuch banta hai, aur jab wakt aata hai zindagi ko jeenay ka tab mun main na tu daant rehtay hain na jism main wu sakat kay un lamhaat ko jee sakay.

Buhut hi ajeeb hai ye insaan bhi, nafs ko maar bethay tu qalandar aur nafs say haar jaye tu fakat sirf aik aam sa nakaam - Insaan

ZARA SOCHO TU SAHI.....

kya huga? dharnay denay say kya huga? ronay peetnay say kya huga? cheekhnay chillanay say kya huga? aesa karo, gharon ko laut jao, aur ja kar so jao, jesay kay pichlay 60 saalon say sotay aye hu. aur jesay kay aaj bho so rahay hain baaki sab.
Suno, tumhara sath denay ko koi nahin ayega, hukmaran tu kabhi nahin aingay, aur agar aye bhi tu sirf tamasha dekhnay aingay, ye dekhnay aingay kay koi zinda tu nahin bach gaya.

Hum wu log hain, ju museebat aur ghussay kay wakt hosh-o-hawaas kho beht'tay hain. Aray jab humain sabar say kaam lena chahiye hum shehar jalana shuru kar detay hain, apni hi dharti, apnay hi logon ko jala kar kya huga.

Kesay apnay hi mohsin ko do pal main ghaddar bana dala, us roz Mauhtaram Quaid Jinnah ki shaan main ju gustaakhiyaan ki gaye, uskay zimedaar afraad tu aaj tak awaara ghoom rahay hain.

Meray naadaan logo, jaltay huwe aashiyaane per tail kaun daaalta hai, kabhi aesa bhi huwa hai kay koi museebat zayada hu, pareshaan hu, gham aur ghussay main mubtila hu aur aesi halat main apna hi ghar jala daalay?

Meri maano, chup chaaap ghaflat ki neend soye raho, ye jhuti baatain, banawti amal, aur ye natak band kar daalo, tumhari chaar baaton say koi badlao nahin ayega, ye dangay fasaad tumhain kahin ka nahin choraingay, meri maano sotay raho ghaflat ki neend bas.

Baat kartay hu inqalaab ki, inqalaab apni hi dharti maa ko jalanay say nahin aatay, apnay hi logon ki jaanain lenay say nahin aaya kartay, inqalaab us soch ju hamaray jazbaat say khelti hai, usko maarnay say aaya kartay hain

Jab apni hasti ko is qaabil samjho tu baat karna………….

TALAASH.......

Aksar aur beshtar, youn bhi huta hai, kay dil dharakta huwa mehsus tu huta hai per zinda hunay ka ehsas nahin huta. Beshumaar hasratain insaan kay dil main peda huti hain, aur aesa wakt bhi aata hai, jab wuhi hasratain, naa-umeedi ka libada orh leti hain. Naa-umeedi bhi buhut hi ajeeb cheez hai, deen nay haram kar rakha hai, per ye har shaks kay wajud main kahin na kahin zarur maujud huti hai, aur agar na bhi hu tu zindagi aur halaat insaan ko is kay samnay kabhi na kabhi zarur la khara kartay hain. Insaan ki khuwahishaat usay buhut majboor kar dalti hain, kay wu aesay feslay karay ju zindagi main aagay chal kar sharmidagi ka baes bantay hain. Anjanay main kiye janay walay feslon kay aagay dil bebas hu jata hai, aur inhi ghalat feslon ki zad main aakar wajud aesay zakhm khata hai ju zindagi bhar shayed bhar nahin patay.

Bazaahir tu buhut say lamhaat aesay bhi aatay hain, jab faraaar kay raastay wa'azay dikhayee denay lagtay hain, lekin phir yeh soch aaray aati hai kay faraar hu bhi tu aakhir kis say? Apnay aap say bhi koi aakhir bhaag paya hai aaj tak. Ye apni hi zaat say ki janay wali jang bhi tu buhut hi khatarnaak huwa karti hai. Mainey bhi yehi himakat ki, apnay dil say hi lar betha. Apni hi khuwahishaat ko apna hi dushman bana betha main.

Main ye tu nahin janta kay meray dil aur meray wajud ki is jang main, kaun jeet paya hai. Haan! itna zarur janta hun kay jab tak saansain chalti rahaingi, tab tak ye jang bhi shayed chalti hi rahaygi. Main ye jang jetnay kay liye kabhi nahin lara, main tu bas apni shanaakht haasil karnay kay liye larta aaya hun.

Bas, jis pal mujh main apna aap mil gaya mujhey, shayed usi roz main is dil kay aagay haar jaunga apna sab kuch. Mujhey talaash hai tu apnay aap main chupay us shaks ki, kay jisay phir shayed kabhi koi kamzor na kar payega.

Main agar ye jang hara tu bas isliye kay zindagi ko dikhana chahunga, yehi kay, haar kar bhi jeeta kesay jata hai.......

AGAR TUM IJAZAT DO TU.....

Suno, agar tum ijazat do tu main tumhari sab yaadain mita daalon, meray dil aur dimaagh main ab koi jagah nahin baaki, buhut si sochain aati hain aur wapas chali jaati hain. Muhabbat kay junoon main sab tumhain sonp dala tha. Youn mehsus huta tha kay shayed umr bhar tumhari yaad sath rahaygi, magar tum hi batao ab, kya ye mumkin hai, tum sath nahin, phir bhi tumhain sath liye kesay chalon?

Agar tum ijazat do tu main phir say muhabbat kar daalon, buhut say log hain jinko, tumhari deed ki khaatir, tumharay pyaar ki khaatir, tumharay hi intezaar ki khaatir, hamesha rokay rakha hai, unhain maloom hai kay main tum say hi pyar karta hun, magar phir bhi tum ye dekho, buhut belaus muhabbat hai, unhain mujh say hamesha say. Magar mainey unhain kab say tumharay naam ki khaatir, muhabbat say mehroom rakha hai, tumhari muhabbat nahin hai paas, muhabbat ki is duniya mian, tum hi batao main kesay rahon?

Agar tum ijazat do tu main phir say jeena chahta hun. Mukaddar tu hamesha mujh say khelna chahta tha, usnay khela bhi, aur jeeta bhi. Tum hi batao, mukaddar kay feslon kay aagay kaun jeet paya hai? Hakeekat jaan jaanay kay baad, mujhey youn mehsus hunay laga tha kay jaan hi jaanay lagi hai. Zindagi tu pehlay hi museebatzada thi, tu ye soch kar dil ko tassali di kay chalo younhi sahi. Tum nay bhi jatay jatay kuch lautaya nahin, kam az kam kuch tu luta jaati, mujhey meri shanaakht hi lauta jaati, per tumhain shayed jaldi thi. Tum hi batao ab, main kis naam say zindagi guzaron ab?

Suno, agar tum ijazat do tu, main aankhain band kar daalon…………..

TERE NAAM KE PHOOL......

meri sab kitabon mai rakhay tere naam ke phool
tar-o-taazaa hain aaj bhi teri yaadon ki tarhaan
wu lamhay kay ju hum nay guzaray sath aksar
qaaim hain dil main jaavaida zindagi ki tarhaan
mera youn toot kay chahna, aur tera chale jana
teh tha ye sab, muqaddar kay usoolun ki tarhaan
teray wu aajiz, masoom lehjay main chupi berukhi
chubti hai aaj bhi seenay main kaanton ki tarhaan
tujhey tu aadat thi sab adhura chor jane ki, lekin
teri yaad aaj bhi zinda hai dil ki dharkan ki tarhaan

meri sab kitaabon main rakhay tere naam kay phool
aksar mehektay hain sandal ki khushboo ki tarhaan

KUCH SAPNAY UDHAAR

aao kuch sapnay udhaar lay kay dekhtay hain
unhi sapnon say kismat aazma kay dekhtay hain
mili khushiyan tu muddaqar kay sikandar hungay
gham ju aye tu phir qarz chuka kay dekhtay hain
sath ju chalo tu koi baat nahin ghabranay ki
aik baar phir usi raah pay chal kay dekhtay hain
waja jafa tu sab kitaabon main mila karti hain
chaho tu is muhabbat ko azma kay dekhtay hain
in wehsaton nay ju gher rakha hai ab har pal
aao aik baar zara jaan say jaa kay dekhtay hain

meri maano tu...
aao kuch sapnay udhaar lay kay dekhtay hain
unhi sapnon say kismat aazma kay dekhtay hain

KYUN ANJAAN BANAY REHTAY HU...

jao kisi aur ko sunana ye kissa

ye dilasay, ye zaat ka nisaab

raat ka ye gehra kaala rang

keh deta hai sachaye sab

tum samajh nahin patey,

ya samajhnay kay bawajud

anjaan banay rehtay hu?

AIK SHAIR....

in ishq kay zaawiyon ko tum kya samjho

tumhain tu hisaab kitab say nafrat thehri

kaunsi lakeer seedhi kaunsi terrhi lagaye

kya huwa, muhabbat huti tu fark bhi parta